30/06/12

GUSTOUME... (4)

Esta semana fóiseme das mans: traio páxinas de máis, me parece a min. Ao allo, loguiño!

Visto en PopChartLab
Bonito, eh?

Como esta semana comeza a Feira do Libro sigo cun. Pero un peculiar: un libro que non pode esperar...

Se ides estar pronto por San Sebastián non vos perdades esta iniciativa: unha panadería "pop-up", lle chaman. Seguindo coa comida, por enfiar aínda que só sexa un pouco, gústanme as verduras á parrilla, coma estas. E esta salsa ten boa pinta... haberá que probala!
Remato o tema culinario cun gran post: que está de temporada no verán? Descubrídeo aquí, que hai que comer san e barato!

Unha cousa molona: animais de corcho.

Visto en Nometoqueslashelveticas.com
E coxíns de robots! Xenais!

Visto en Decoesfera

Se, coma min, vos gusta o sonido da choiva, podedes probar este disco. Aínda que de prezo vos vai saír mellor visitar SimplyNoise, que ten unha preciosa tormenta para descargar gratis.

En Disquecool recopilaron unhas cantas cabeceiras de series míticas (dos 90, para os que pasamos da trintena e nos empeza a morriña adolescente).

Este é outro bon recopilatorio: por se vos pasa pola cabeza algunha tolería como casar, non vos perdades o monográfico sobre vodas low-cost que fixeron en VigoLowCost. Todos os post están nesta etiqueta.
Unha boa lección: a boa produtividade, pero a que vén de dentro.

Arte en vaixelas... Pois si que se pode, si...

Visto en Con botas de agua
Gústavos LEGO? Velaquí a súa nova creación: unha casa encantada! Mola!

Visto en Compradiccion
 Nas cousas de decoración gustoume este artiguiño sobre o truco do "antes e despois" (e é que ás veces se pasan!).
Tamén estas ideas, a ver como colgo eu os cadros no pasillo, que xa toca...
Fuxindo do caso da xente que ten libros de mentira (cousa moi triste, se me permitides o comentario), mólame esta idea: almacenaxe oculto tras lomos de libros. Así podes ter todo ordenado ou agochado e a estantería non delatará o que ten dentro por algures!

Visto en Decoesfera
E para remtar... Si, teño un problema coas cociñas: encántanme, coma esta.

Visto en Designmom

29/06/12

Work in progress

 E veremos que sae disto co que andiven onte e hoxe. Hai por aí a quen lle soarán, ou poderían :)
Agora, que seque ben, para seguir outro día.




Feira do Libro de Vigo

Por se andades despistados, cóntovos que hoxe comeza a 38 Edición da Feira do Libro de Vigo. Por moito que rebusco, non atopo a axenda completa do evento, só novas, pero cónstame que a última fin de semana haberá libros de agasallo con cada compra, que teremos presentacións de libros de moitos dos nosos autores e, que carallo, que vai haber libros para disfrutar nun bonito paseo pola Plaza de Compostela!

*Na Axenda da AELG van poñendo os eventos destes días, a falta de axenda, pode ser útil.

25/06/12

Arrastraba tras de si unha ringleira de edificios

Arrastraba tras de si unha ringleira de edificios
dende que a cidade lle guindara o seu pesado ceo nos ombreiros.
Dende aquel día que se trabucou.
Confundiuse e chorou no canto de durmir.
E chorou 8 horas, como mandan os médicos.

23/06/12

GUSTOUME... (3)

Chegou o verán. Aviso, por se se vos pasou.
E que houbo de novo esta semana? Pois, aparte das miñas vacacións, unha semaniña que remata tan subitamente como chegou, algunhas caralladas que descubrimos pola rede.

De tengounhornoysecomousarlo.com
Para quitar a fame, unhas hamburguesas con piña. Di si á piña asada! E facendo nós o pan da hamburguesa xa triunfamos

Como facer unha libretiña cosida.

Descubrín que nos 80, Apple lanzou unha liña de roupa. Coidado, poden arder as retinas.

Unha nova entrada de Cómo no ser una drama mamá. Sempre saca unha risiña.

O booktrailer de Dragal, a triloxía de Elena Gallego publicada por Xerais.

Gústanme as bicis clásicas (aínda que en Vigo o da bici non é unha opción, alomenos para min) e aquí véndenas ben bonitas.
E máis de bicis, unha iniciativa ecolóxica para a mensaxería en Vigo.

Seguindo por Vigo, alternativas para ir de compras fuxindo das grandes cadeas. Encántame Terra de Baol e tamén Vilma, claro que para esta si que hai que aforrar abondo...

Unha imaxe vale máis ca mil palabras.

Un póster molón. E outro máis:

Visto en nometoqueslashelveticas.com
Non lle facía eu asco ningún a vivir neste "apartamentiño".


Vía Vintage & Chic
Esta casa éme branca de máis, pero qué cociña...

Via Rue Vintage 74
Ei, e eu tamén actualicei, vístelo? [1] [2] [3]

Boa finde!

21/06/12

Os amores non se enfían


Hai amores contrafeitos
que se tornan parafuso,
premen na carne a súa ferruxe
en avance helicoidal
                                               cara ao corazón
                                               cara ao orgullo
                                               cara ao erro.

Hai amores contrafeitos
que resultan ser chanzos,
que te empurran na distancia
                                               cara a embaixo
                                               cara a enriba
                                               cara a outro.

Hai amores contrafeitos
que non son máis ca un ensaio
                                                para min
                                                para ti
                                                para nós.

Ilustración de A. Buenafuente

19/06/12

Negro e gris


Ilustración para a Dot:43
Esta é a ilustración que aompaña ao texto de Sergio Lagartija deste mes de xuño na Revista Dot, que podedes ler online en Issuu aquí.
A mín ségueme gustando máis a do número anterior, a Dot:42, esta:


Ilustración para a Dot:42
Que vos parece?

16/06/12

GUSTOUME... (2)

É a segunda semana destas entradas e xa chego tarde. Mellor tarde ca nunca, non?

Descubrín as receitas en video sinxelas e con moi boa pinta de Sarah Carey. Coma as mini-pizzas ou un facilísimo polo asado que ten unha pinta de-li-cio-sa!

Esta merluza ao cava ten unha pintaza.

Toca visitar Barcelona pronto, por que non? Aquí hai ideas de onde ir comer, haberá que probar!

Tamén hai que ir por Madrid, espero que antes de setembro para poder ver a exposición de Hopper no Thyssen!


 Gústanme moito os chans con baldosas porcelánicas.


Chans porcelánicos, visto en Decoratrix
Chans porcelánicos, visto en Decoratrix
Unha boa idea para decorar.

Tamén me gustou este chiste:


Hay cousas que non me gustaron moito, pero que non se poden olvidar como as tristes voltas ao pasado, o pouco que sabe a xustiza de xustiza e os salvavidas que nos afogan.

Boa fin de semana!

12/06/12

Moitos ceros


Medidas de Ahorro, no blog de Cinta Arribas: http://cintarribas.blogspot.com
Ilustración orixinal de Cinta Arribas
Cando Jacinto José Álvarez González se decidiu polo seudónimo J. J. Algón para os seus libros, concedeulle a súa primeira entrevista mental a un medio autonómico. Foi a primeira e a última. Convencido de que as súas inexistentes novelas se convertirían nos famosos best-sellers que merecerían ser, o listón subiu rapidamente, pasando pola prensa escrita nacional ata un programa especial de Página 2, sen esquecer breves incursións nos talk-shows nocturnos norteamericanos.
J. J. Algón brillaba naquelas entrevistas como o persoeiro que era, con comentarios áxiles á vez que meditados e con titulares regalados de sentencias tremendamente poéticas. Pero, mentres J. J. vendía libros sorríndolle ás cámaras, a Jacinto José Álvarez González esquecéralle a parte máis importante do asunto: escribir.
O seu problema non era só encher páxinas nin atopar historias interesantes de contar, o maior obstáculo no seu camiño era unha escandalosa ineptitude para a escritura, un pésimo dominio da lingua, insólito en tan ávido lector, mesturado coa preguiza de quen cre sabelo todo. A combinación de ambos parámetros viña significar que, ante a primeira dificultade gramatical, sempre parecía máis interesante ofrecer unha entrevista imaxinaria que aprender nada novo. De todos xeitos, non precisaría saber nada unha vez que fose famoso.
Á familia vendéralle que estudaría biblioteconomía e documentación polo seu grande amor aos libros, cousa que non era mentira, pero, no fondo, fascinábao poder contar na súa biografía como xurdira dun fondo documental universitario o grande J.J., cun santo grial nas mans, un libro que o catapultaría a un pedestal dende o que diría non ter esquecido os seus humildes comezos na biblioteca da facultade de filoloxía.
Como era de esperar, a trintena pillouno sen santo grial, selando préstamos, botando sorrisos falsos aos lingüistas sabichóns que rían do seu pluscuamperfecto sen compoñer e do seu castrapo incorrixible, e botando sorrisos inútiles ás universitarias de amplios escotes e escasas faldas. Gozaba da sorte, non obstante, de gustar do seu traballo, e o paso dos anos non cambiara o seu san costume de curiosear que libros collía a xente, de follealos para comprobar se a el lle gustarían, de imaxinar a personalidade dos lectores segundo o libro e a personalidade do libro de acordo cos seus lectores. Nunha das súas incursións entre os volumes recén devoltos, como en tantas outras ocasións, atopou un anaco de papel. Este anaco de papel non era un roto de folla cuadriculada, como era habitual, senón un rectángulo perfecto de papel azulado, con letra mecanografada no reverso. E todas as letras mecanografadas, coma as manuscritas, merecen ser lidas:
Páguese al portador la cantidad de #150.000# €
Ciento cincuenta mil euros
Jacinto quedou pálido e sen alento e releu o papel varias veces. Deulle corenta mil voltas, buscou a marca de auga, procurou en Google datos do banco de procedencia e todo, absolutamente todo, apuntaba a que era un cheque de verdade, un cheque ao portador.
Durante o resto da xornada sentiuse flotar, elevado por unha forza superior dentro do peto dos vaqueiros e pagou prazos mentais da hipoteca con sorriso de imbécil. Ao día seguinte, martes, o cheque seguía no peto, facéndolle ferver a nádega, e, co pulso a lle tremer, deu apuntado na axenda “Cheque”. O mércores non chegou a tempo á sucursal e tivo que ir para a casa co picor do papeliño no peto traseiro, tatuándolle o cu con varios ceros e amosándolle no maxín un iate listo para arbolar no pantalán do náutico.
O xoves era o día, os xoves abren pola tarde. Era un día que sempre lle gustara e este ía gustarlle aínda máis. Traballou ausente toda a mañá, cunha urxencia que o comía por dentro e para almorzar abondoulle con uñas e padrastros. Na cola da sucursal, cuberto de suor, custáballe estar quedo, tremíanlle os xeonllos, aínda que o fervor da nádega case desaparecera… Agora que paraba pensalo, non sentía ningún calor. Botou a man á cacha e non sentiu contido ningún no peto. De feito, non había peto. Saíu da oficina correndo, encarnado de carraxe, rosmando para si “seré gilipollas, seré gilipollas” sen parar ata a porta do seu piso.
Ao entrar, a lavadora viña de rematar o centrifugado. A roupa do tambor estaba cuberta dunhas folerpiñas azuladas.
 Máis ilustracións de Cinta Arribas no seu blog.

11/06/12

Premios Xerais 2012

Marcos Calveiro e María Lorenzo e Manuel Lorenzo (Foto: Xerais)

Xa que o outro día falábamos de premios literarios, vou aproveitar para poñervos a nova dos gañadores da edición 2012 dos Premios Xerais.

O Premio Merlín deste ano foi para Marcos Calveiro por Palabras de auga, mentres que o Premio Xerais de Novela o levaron a parella de pai e filla composta por María e Manuel Lorenzo, coa obra Tonas de laranxa.

Hala. Pa' o ano terá que tocarnos a nós, ou?




08/06/12

GUSTOUME... (1)

Esta é a primeira entrada que non ten que ver co espírito orixinal da Gramática de Corpos, pero é algo que me vén apetecendo hai tempo. A idea é xuntar os enlaces ás cousas que máis me gustaron esta semana: novas e artigos de opinión, fotos bonitas, receitas dignas de gardar e posts dignos de mencións entre todo o que leo cada día. Haberá, dentro do posible, un "Esta semana gustoume" cada venres.

Todos os días visito varios blogs de gastronomía e acabo sempre gardando algunha receita...
En fin, aínda que estou con menú de operación bikini, teño dereito a babear, ou? Esta semana salivei ao ritmo destas Hamburguesas de pavo y cebollitas glaseadas (igual sen mozarella cola como light) e dunhas Caracolas Saladas... Eu non son moi de dulce, pero con xamón e queixo non se lle fan noxos a nada!
Por suposto, non deixedes de ler o Consultorio do Comidista, risas aseguradas.

Tamén son asidua aos de decoración, que poden ter ideas e fotos chulas. Que vos parece este rincón de lectura con vistas?

Rincón de lectura, visto en Decoratrix
Esta ilustradora é unha artistaza! Chámase Jenni Sparks e eu descubrina esta semana porque debuxou á man un mapa de Londres xigantesco e precioso!

Hand-drawn map of London by Jenni Sparks
Se vos poñedes creativos e vos apetece, por que non tunear unhas camisetas?

 Entre as cousas que molan, hai pezas de louza decoradas, fachadas de cores,...

JeezVanilla en Etsy
Visto en planos-lowcost.com

Visto en planos-lowcost.com

A Princesiña...
Non é novo desta semana, xa que se presentou o mes pasado, pero, por se non a coñecedes, recoméndovos que lle botedes un ollo á opera prima da compañeira Clara do Roxo: A princesiña que conducia unha locomotora. Un libro para nenos e nenas... e para princesas con personalidade!

E se no canto das princesas vos interesan os fogóns, tedes que saber que vén de saír en papel o novo libro de Recetas de Rechupete, Comer Bien a Diario (tamén dispoñible en eBook).





Entre as reflexións tristes pero necesarias, quero gardar desta semana este artigo de Escolar, polo mes de xuño que nos vén enriba e tamén un último adeus ao grande Bradbury.

Ui, creo que para a próxima semana intentarei ser máis breve...

07/06/12

Por se vos gusta isto de escribir

Eu aínda teño que me poñer a traballar noutras cousas, eso de diversificar, pero co libro en revisión e co placer inmediato de bloguear, a cousa complícase. Mesmo se non dá tempo para moitas convocatorias, cómpre ter balas na recámara, pois o ano que vén estarán aí de novo!

Por se vos animades, velaquí algunhas convocatorias que aínda están abertas, coa información da Axenda Cultural da AELG:

NARRATIVA 

XIII Premio Vicente Risco de Creación Literaria
Poden presentarse novelas, conxuntos de relatos, ensaios, etc. en lingua galega cunha extensión mínima de 150 páxinas e máxima de 300*. O premio son 6.000 € e a publicación da obra.
O prazo remata o 1 de outubro de 2012.

XXX Premio de novela longa Blanco Amor
Ai, quen puidera... Para este premio presentarase unha novela longa inédita en lingua galega que supere as 150 páxinas* (permítese a doble cara, cun máximo de 75). O premio son 12.000 €.
O prazo remata o 28 de setembro de 2012.

VI Premio de Narrativa Breve Repsol
Para este falta menos, xa que remata o 20 de xullo de 2012, pero ao ser de narrativa breve a extensión é dun mínimo de 50 follas e un máximo de 120. O premio son 9.000€ e a publicación da obra.

POESÍA

XIII Premio de Poesía Díaz Jácome
Este certame ten un límite de idade nos 30 anos. Os orixinais inéditos deberán ter unha extensión máxima de 150 versos**, con tema e metro libres. A admisión de traballos remata o 2 de xullo de 2012 e establécense 3 premios de 1.500, 600 e 300 €, ademais de placa e diploma.

I Premio de Poesía Manuel Leiras Pulpeiro
Presentaranse poemas orixinais e inéditos (conta o formato dixital) cunha extensión máxima de 150 versos**, tema libre. O prazo remata tamén o 2 de xullo de 2012. Os premios son tamén de 1.500, 600 e 300 €, ademais de placa e diploma.

XXV edición do Premio  Nacional de Poesía Xosemaría Pérez Parallé
É un premio para novas voces, polo que os autores non deberán ter obras individuais de poesía publicadas.  Presentarase un "libro" de poesía cun mínimo de 300 versos. O premio consiste en 500€ e a publicación da obra na editorial Espiral Maior.
O prazo remata o 29 de setembro de 2012.

___________________________
*Lembrade que a medida para os certames adoita ser de folios DIN A4 a dobre espazo, letra tipo Times New Roman a 12 puntos e a unha soa cara.
**Mecanografados a dobre espazo.

06/06/12

Estou feita de

Eu
que fun oídos e ollos de milleiros de letras
e crin estar feita de libros.

Eu
que fun lápis e carbón,
que fun bolígrafo inquedo e cores nerviosas
e crin estar feita de lenzos.

Eu
son as palabras que debuxo
son os trazos que escribo
son as ideas que durmo e as vidas que soño
porque
eu
do que estou feita
é de cadernos de min.

05/06/12

Esqueces

Foto: Sabela Glez. - Camelle, abril de 2012
Contan das pedras que che fan as beiras
e dos felgos que che bailan
os suspiros.

Din das flores que te envexan
e dos tecidos
que te gozan esvarándote ao andares.

Esquecen,
cres ti,
que es máis ca un sorriso
e ti sínteste louza
e ti sínteste pote vello.

Esqueces,
creo eu,
que es só un autorretrato
e que pintaches os beizos
e que pintaches a alma.

04/06/12

Back in business

Foto: Sabela González - Fisterra, abril de 2012
O prometido é débeda. Estou de volta.

Dou por rematado o tuneo visual que xa anunciara, e espero que o rexurdimento creativo lle siga sen tardanza.

O de facer outro blog foi unha idea que rematou no lixo. Xa dá un abondo que facer, así que o de xuntar churras con merinas vai acontecer. Iso si, imos separar as cousas para entendérmonos ben: na páxina EU explícovos como.

E que hai dese libro sen comiñas? Pois creádelo ou non, está ben medrado, pero aínda necesita unhas boas fregas. Xa vos irei contando, que ben o merecedes.

En fin, aquí estou, despois de ir ata a fin do mundo, volvo á orixe e volvo ao meu, tecla a tecla e letra a letra. A gramaticar. Vides comigo?

ETIQUETAS