21/02/08

O home de vinilo


O home de vinilo é mouro coma a noite.
Un suco finísimo percorre o seu corpo
da cabeza aos pés,
e agocha melodías, ritmos e sons que ninguén coñece.


O home de vinilo vive baixo a cabina do dj,
nun buraco acolchado con teas e coxíns
para non raiar as súas pistas contra as esquinas.


Os sábados á noite,
senta nunha butaca verde,
sorbe whisky con coca-cola por unha palliña
e escoita atento as sesións.


Cando é hip-hop,
dá co pé no chan.
Cando é minimal,
move a cabeza e sorrí,
amosando unha galleta vermella de Television Records.
Cando pincha ela
a súa perfecta combinación de músicas,
fica quedo,
observa
e teme derreterse de paixón e estragar as pistas que o cubren.


Ela é un androide cuberto de terciopelo granate,
con finas agullas nas xemas dos dedos,
que fai malabarismos cos discos
e esculturas cos sons.


El pensa que é fermosa coma o son dun piano,
que a súa música sona coma un cadro de Lempicka,
que o seu sorriso brilla máis có revés dun cd,
que as súas palabras riman todas.


E por iso non lle fala.


Pero hoxe empuxámolo onda ela,
presentámolos,
ao home de vinilo e ao androide de tercipelo,
“el ten música no canto de estómago”,
“ela fai remezclas cos ollos”.


E, cando a súa conversa foi máis densa cá música
cando xa era mañá e abrían as panaderías,
cando cruzamos os brazos e puxemos cara de querer pechar,
o home de vinilo e o androide con agullas nos dedos apertáronse,
e soou a melodía máis bonita que escoitáramos nunca.


Alguén lle subiu os baixos,
alguén subiu o volume,
e remezclámola e bailámola,
mentres eles xiraban, soaban e se bicaban,
ata que caímos rendidos, estrados polo chan,
e xa abriran os quioscos.



i never loved nobody fully
always one foot on the ground
and by protecting my heart truly
i got lost in the sounds
i hear in my mind all these voices
i hear in my mind all these words
i hear in my mind all this music

Fidelity -- Regina Spektor

8 comentarios:

  1. Ufff...a criaçom é sempre um acto de amor, com vagas fortuitas de fortuna.

    ResponderEliminar
  2. Qué bonito!!!
    Gústame pensar na metáfora, que implica...moi bonito!!!
    Un biquiño.
    Por certo espérache un meme no meu blog!!!

    ResponderEliminar
  3. vermello... o seu soriso só podía ser desa cor, vermello.

    ResponderEliminar
  4. Boa maneira de recibir o amencer.

    ResponderEliminar
  5. Cáeme ben o tipo ese :)

    ResponderEliminar
  6. Nenita, ¿dónde andas?

    ResponderEliminar
  7. Moi divertido. Rin e disfruteino. Apertas.

    ResponderEliminar
  8. Bonita historia de amor entre inanimados, capaces de provocar emocións en terceiros alleos a aventura.

    Orixinal e apaixoado, coma sempre.

    Un saudiño.

    ResponderEliminar

Dime que pensas...

ETIQUETAS