GUSTOUME... (8)

Xa estamos aquí! Xa logo chega agosto para facerme máis vella, e eu sen coroa de aniversario aínda! Polo menos traio posts fresquiños de cousas molonas. Aí van!

O ilustrador que máis me gustou esta semana vino en No me toques las helvéticas.Chámase Lim Heng e ten esta ilustración tan curriña e outras moitas mesmo feitas camisetas en Threadless (tiendaza, logo non digades que non recomendo cousas boas). Tamén podedes ver o seu traballo na páxina ILoveDoodle.

Visto en No me toques las helvéticas

En muy molón vin unha idea preciosa para regalar: recordos!

Andamos de olimpiadas, así que botade un ollo a estas camisetas olímpicas retro!

Non vou poñer fotos de comida que xa estou eu abondo famenta a estas horas, pero si que vos deixo unha receita para verán de ensalada de espinaca con polo asado e patacas crocantes, un aliño distinto para as sardiñas e un postre rico-rico: piruletas de froita con chocolate.  Máis de comida, unha reflexión interesante os 10 pratos máis sobados do momento, por Mikel Iturriaga.


A rapaciña das Helvéticas estivo sembrada esta semana de achádegos preciosos, que vos parecen estes pósters de caras tipográficas? Por algo se chaman type faces, ou?

A cara da Times New Roman

Como ten que molar ten un taller ou estudo coma este para traballar... Eu non fago cousas de tea, pero vexo sitio para pinceis, recortes, lápices e o meu amigo o PC (o do portátil abandónase en canto che doen as cervicais a morrer con vinte e pico anos...). Ainsh! Soñar é gratis!

Visto en Design Sponge

Neste enlace, tedes a clave de como amañar calquera cousa, pero calquera-calquera, do mundo mundial explicado con sinxeleza. Enxeñeiros a min, ha! :)

Coma unha vaca en brazos son de pesada, seino. Así que me repito, pero é que estas bicis de estilo antigo son preciosísimas! Mágoa que en Vigo haxa tanta costa...

Orixinal de Room 269

Non teño moita cousa de decoración (sen fotos de cociñas? imposible!) pero teño que contarvos (salto, salto, emoción, palmada) que pronto estará disipoñible o catálogo 2013 de Ikea, sancta sanctorum dos que salivamos ante revistas de decoración e detalles a bo prezo. Eu vou empezar a dar a tabarra no quiosco en breve.

Cociñas non hai, pero gústame moito o cadro (o da dereita!) desta imaxe e a libraría que vos poño a continuación. A quen non lle gusta unha libraría ben repleta cubrindo a parede?

Visto en Rue Vintage 74

Visto en Rue Vintage 74

Neste enlace, visto en Little Brown Pen, hai unha lista de cursos gratuítos online de grandes universidades. Non está mal botarlle un ollo. Haberá un de Illustrator? Hehe.

E para rematar, de actualidade, déixovos un bo post de Enric González en Jot Down.

Boa semana!

Pasos

Foto de Sabela González

Damos pasos xuntos
un pé diante do outro
e só sabemos xuntar as mans dun xeito.

Damos pasos xuntos
camiñamos
pola rúa e a metáfora
e só sabemos rir a gargalladas.

Damos pasos xuntos
un pé diante do outro
pola metáfora
e só sabemos xuntar as mans a gargalladas.

Outro "work in progress" (II)

Ontes xa vos amosei o paso a paso da ilustración que lle estou facendo a unha amiga. E hoxe haberá que rematala antes de marchar de fin de semana! Seguimos coloreando!

A saba de abaixo é branca, así que só falta Alice!

Aí a está! Non é unha marabilla, pero non está mal, non? Faltan os toques finais!

Que tal así? Só falta que lle guste a Marta!

Outro "work in progress"

Estoulle facendo unha ilustración á miña amiga Marta para un agasallo que vai facer e quero compartir o paso a paso. Vaia por diante que nin son profesional da ilustración nin controlo abondo das ferramentas que hai para facer algo mellor, pero a falta de coñecementos de Illustrator (xa me gustaría) imos tirando de Photoshop así:

Primeiro escaneando un boceto feito a lápiz:

Logo trazando por enriba. Normalmente trazo a tinta á man, pero desta vez quixen probar a trazar no ordenador da única forma que sei: marcando os puntos de áncora e contorneando parte a parte, por se acaso. Primeiro a meniña, Alice:

E logo todo o trazo de lápiz. Así pódese corrixir moito máis fácil! Xa veredes que a lúa non me convenceu aí...

Coa lúa recolocada, toca poñerlle cor... e eu son negada. Así que imos probando primeiro cos obxectos, deixo o difícil para mañá!

 Mañá xa vos ensino como quedou!

Certame nacional galego de narracións breves

Outro certame aberto e este é de cousas breves, por se andades faltos de folios cheos!

XXXVIII Certame Nacional Galego de Narracións Breves Premio Modesto R. Figueiredo, 2012

Presentaranse unha ou máis obras inéditas e non presentadas a outros certames que estean escritas en galego, cun mínimo de 5 páxinas A4 e un máximo de 30 (mecanografados a dobre espazo por unha soa cara.

O prazo de presentación remata o 2 de novembro de 2012 e o premio é de 1.000 €. Tedes máis información no enlace do título. A darlle á tecla!

Un señor con zancos

Ilustración de Sabela González

Esta é a ilustración que acompaña o texto de Sergio Lagartija na revista Dot de agosto e setembro. Este novo número está ao caer, non deixedes de velo ou descargalo! E se non recibides o boletín semanal non sei a que raio estades esperando...

ACTUALIZACIÓN: Xa está dispoñible en formato electrónico aquí e en papel nos puntos de distribución habituais! 

GUSTOUME... (7)

Visto en MarthaStewart

O luns parece ser o mellor día para recomendar enlaces. Por que? Porque paso de currar a finde, definitivamente. E vas currar agora nas túas (breves) vacacións? Preguntarédesvos... Pois si, eu son moi ben mandada e ademais sei programar entradas no blogger :)

Sinto, por outra banda, non actualizar o suficiente, pero dadas as circunstancias, coido que non o estou a facer tan mal! Veña, clicade e paseade pola rede, que será por cousas molonas!

Comezo coa comida? Para variar. Pois direivos que non poido dicir "aros de cebola" sen babas. Así que aí van: aros de cebola! (slurp!).


Da fritanga ianqui á bella Italia. Como sabe esta xentiña... Que si focaccia, que se unha salsa perfecta para o verán, mesmo un restaurante para apuntarse nunha visita a Madrid!


Ademais de cociñar, pódese salvar o mundo... pouco a pouco, pero que non se vos olvide.


Hai cousas que alegran o día, coma as mulleres orgullosas da súa idade ou  estas láminas con mensaxe. Será por láminas! Encantáronme estas e tamén esta, para sentirse ben (e é que en muymolon.com teñen cousas ben guapas):

 

De muymolon.com

Logo tamén hai pósters complicados de máis... pero a quen non lle mola Batman?

Por certo, momento nostalxia dos 80 e 90: non vos perdades estes videos.

O mellor momento DIY desta semana son estas escaleiras. Dánme ideas de máis...

Coxíns bonitos, estanterías de envidia,... será por buscar!

Visto en Kireii

Visto en Kireii

Casas que molan? Mirade que suelos e que portas, máis baba!

Visto en BohoDecoChic

Aí vai a cociña, que xa vos tardaba:

Visto en Virlova75

Visto en littlebrownpen

Pianos e qwertys

Foto: Sabela González

 Alguén creu boa idea ensinarme piano.
Digo ensinar e non digo aprender moi conscientemente.

Alguén, agora seino,
trabucárase de teclado.

Empecei bum-bum, coa máquina de escribir,
aguilucho de uña retorta,
letra a letra,
e o procesador de texto fluorescente faloume de Paquita a aviadora.
Onde quedou Paquita!
Co pelícano de Calahorra e a Oca Cotilla, supoño.

Pedín aprender con todos os dedos
e escribín

asdfg
ñlkjh
asdfg
ñlkjh
asdfg
ñlkjh
e logo mente
moitas veces
mente
mente
ción
ción
ción.

Coma unha pianista que non fai música
din en xuntar letras
e bailan as mans polo qwerty
e bailan as mans polo poiu
e báilame a cabeza polo word
onde xa non está Paquita
que estou eu
soñándome nun estante
soñándome de papel.

Foto: Sabela González

GUSTOUME... (6)

O da semana empezo a tomalo dun xeito bastante laxo, pero é o que ten ir de fin de semana ver á familia, que tanto dá non actualizar o blog.

Gustoume que en disquecool falaran dun novo local de hamburguesas que hai en Vigo, xa fun un par de veces e a verdade é que, a pesar dos prezos, está moi ben. Se non me credes, mirade que pintaza:

Pepita sorrentina, ñam! En La Pepita Burger Bar

Pintaza tamén teñen estes pans recheos de quiche... Light, light non é... E quen me mandaría ir ao blog orixinal da receita, Spoon Fork Bacon, ten pinta de prometer...

Visto en Cocinar para dos

Algo máis san para compensar (e por aquelo de que eu estou a dieta e as gochadas me fan salivar)? Que tal un ceviche? Parece idea xenial, aínda que eu prescindirei do marisco, non vaia ser o demo...

Toca decoración. Esta semana non vin moita inspiración, se cadra este artigo sobre casas de película (literal), no que sae unha casiña preciosa que xa me gustou cando vin a peli:

A casa de The Holiday por fóra

O baño molón, se ben pequeno, da casa de The Holiday

E a cociña, son eu, ten que saír a cociña

Cambiando de tercio, este apartamento inspira un montón. Gústanme os cadros apoiados no chan. Supoño que para iso teño primeiro que poñer algo nas paredes...

Visto en Decoesfera

E vou acabar o de decoración cun clásico: a expedit! Na miña casa conto 5... mi má! Algún día volas ensino, pero xa aviso que non son tan bonitiñas coma esta.

Visto en conbotasdeagua

Nunha nota algo máis seria, gustoume moito este artigo sobre o éxito: visto o visto, considérome muller de éxito. Si eu xa vos dicía que o truco está en ser feliz...

Tamén hai que poñer o que a unha non lle gusta. E non me gustan os ladróns mentireiros, nin que me tomen o pelo, nin que me manden á merda, e moito menos que nos quiten dereitos facéndonos crer que nos quitan privilexios.

Apertas!

Un fogar

Foto: Iria González

gústame tremer de contenta
e sorrir sen saber por que.
nos tempos que corren, non é cousa fácil.
é maior,
entón,
o orgullo de dar sentido felicidade.
lembrade, sempre, que esta non é un fin
senón un fogar.

O máis difícil

É máis sinxelo escribir de corazóns rotos ca de corazóns inteiros.
Escribir de cerebros e páncreas, de riles e de pulmóns, debe de ser o máis difícil.
Pero eu lévote aí,
en todos os órganos,
filtrándome o sangue en cañas de verán,
estourándome as neuronas en fogos artificiais,
respirándome pel de pomelo nos bronquiolos máis profundos.
É que eu non te levo no corazón,
que non me dá.
Lévote baixo a pel a todas as viaxes,
lévote nos ósos en todos os momentos.

Premio de Ilustración e Narración

Que logo non me digades que non aviso:
O venres publicouse no blog da AELG a convocatoria dun novo certame de narración e ilustración de literatura infantil e xuvenil, velaquí as bases resumidas, máis información aquí:

NARRACIÓN
Presentaranse textos inéditos e orixinais en galego, 6 copias a unha cara e dobre espazo, en tamaño folio ou holandesa, antes do 12 de setembro. O premio establecido é de 1.500€.

ILUSTRACIÓN
Presentaranse un mínimo de dez ilustracións orixinais e inéditas baseadas no texto premiado na modalidade de narración antes do 20 de decembro. O premio é tamén de 1.500€.

GUSTOUME... (5)

Tarde, sempre tarde! A aguantarse e mirar cousas molonas, veña!

Cousas que mola soltar nas vodas - Visto en PopChartLab

Gústame o kraken.
Tamén me gustan as boas iniciativas. Esta é unha editorial de super-vendas en galego. Nada mal.
E gústanme as cousas brandas e suaviñas coma estas:

Visto en Kireei

Visto en Kireei

Visto en SimplyRecipes

 Non empecei pola comida hoxe, pero non a esquezo.
Ten que molar este polo marinado en iogur (que si, que comer rico non dá traballo!) e facer pan sen amasar.
E non penso deixar sen probar esta leituga á parrilla. 
Por certo, o outro día unha amiga levou a unha barbacoa unha cochada boísima: barbecue pulled pork & coleslaw sandwiches (Combinando estas dúas receitas: [1] [2]). Fli-pas.




20 cousas que podemos (debemos!) aprender dos nenos para ser máis creativos.
E falando de creatividade, atención á convocatoria de arte postal de Disquecool.

As casas bonitiñas... por aquí, por favor:

Visto en BohoDecoChic

Vía MakeLemon8 (en RueVintage74)

A ser felices!

Na feira do libro

Aiiii que ben, que ben! Fustes? Espero que si...
Eu pasei varios días: un día cheirar, outro día á presentación do libro de Francisco Castro e Fina Casalderrey, O neno can (un libro a favor de UNICEF que xa estades comprando...) e o sábado gastar os cartos (de boa maneira, claro).

Croquetamente, gasteinos nesto:

Aí puxen colocadiñas algunhas das compras. O da esquerda atrás é El abuelo que saltó por la ventana y se largó, de Jonas Jonasson, que a verdade é que ten unha pintaza de dar para rir un anaco. Ao seu lado está Juego de Tronos. Canción de Hielo y Fuego I. Xa non é só pola serie, que aínda non vin e din que está moi ben, senón porque no traballo levo oíndo falar da marabilla esta xa hai anos e quero ver a que vén tanto lolailo.
Os outros dous son para os meus sobriños. Unha xoaniña-libro para Elsa, que xa logo fai un ano, e un conto moi bonito para Adrián.

 Pero ollo, que hai máis: dúas marabillas de ilustración: Letras nos cordóns (na páxina podédeslle botar un ollo, pre-cio-so) e Circoxidado - El gran espectáculo de Crispín Capote & Flamarión, outra chulada. Déixovos a foto pa' fardar nada máis, que na web vense moito mellor.
 

Basilio e o seu amigo custodiando os libros

P.D.- Entre as cousas que me perdín pero que non quero deixar pasar está a obra Rapoemas, un libro-disco que lle dá unha nova vida aos grandes clásicos da literatura galega, de Aid (unha mostra aquí).

Se este é o día

Foto: Sabela Glez. - Berenguela, Compostela, abril de 2012

Se este é o día
esta son eu
cránio de pedra e corazón mol
resgardado
nas paredes de xilófono
contra as que batín mil cuncas de lata.

Se este é o día
esta son eu

pel inquisitiva e músculo morno
estourando
na carcasa de temores
contra a que bate o vento.

Se este é o día
este es ti
e seralo todos os días
ata que as pedras sexan area
e os reloxios esquezan o son das campás.